Campani

Musiga di lu poaru, campani
chi almunizzani un tempu
sculuritu di sempri.
‘Eti a sunà pal me
la turrata di cheddhi
chi biulani palduti
o l’ansia d’un paesi
chi tendi a un celu nou.
E sutt’a teuli chi l’anni
cunsumani cun tarruli
custanti e senza scampu,
‘eti a sciultà alti ‘iti
da abbracci d’illusioni
di sposi appassiunati.

L’ea di li funtani
spicchjà de’ illu bolu
l’unda di dugna toccu.
E steddhj ‘ani a ghjucà
in stritti acciuttulati
o in lettu di riu
tra pezzi d’un passatu
chi si presenta nou.

Lu passu di la molti
è cuatu illu toccu
chi pendi sutt’a l’abbagliu
di dugna soli o a notti
o in fumaccia nimmica
come un misteru chi a sonu
vostru si ‘o ispaglì,
o campani drummiti
in un sonnu d’affannu
pa’ isciutacci ill’ingannu.