Accurrei!

Incoronau de is appendizius
bellus e allirgus
che muttetus festosus
sezzis in artu, accanta de is celus,
e donas vida a fillus dignitosus,
elegantis che rosas e gravellus
chi mudant s’aspettu de is sposus
prenus de grazia, che santus cun velus,
adoraus in is cresias, gioiosus.
Sorti tengas Casteddu Patria Nostra
giai chi in Sardigna ses postu
po ghia de unu populu onestu,
fattu apposta po binci
dognia tirria e sangiosia,
accorrada intra costa e costa,
in is carreras de sa terra mia.
Bivi Casteddu, cun coru sublimau
sa sorti bella chi Deus t’hat donau.
Esti in sa preneta nostra de ominis,
chi is cosas fattas de nosu arruant;
ma est in sa propriu preneta
chi a pustis is arrutroxas
ateras cosas si strantaxint
e ateras istorias siant scrittas.
In custu tempus nostru
est scriendi una storia noa
s’umanidadi.
In sa metàdi de sa terra
sunti arruendu is murus;
e cresuras prantadas
po separazionis bregungiosas
funti sparessendu
comente candu sparessint
is linguas de fogu,
is linnas attuppadas in is padentis.
Chi sigat! Chi no si firmit
su fai de s’omini bonu.
Chi custus fais no assimbillint
a is tristus fais de su passau
e chi s’araxi de s’orbescidròxu
de unu crasi diversu non durit sceti
su tretu de unu bisu.
Po custu, o fradis, incrubeusì
a dd’arregolliri s’arrogalla
ammuntonada de is sciarroccus,
circheus de ‘ndi boddiri
su chi est abbarrau ancora utili
po costruiri is cosas noas
chi serbant de veras
po sa storia noa de nosu poberus
in sa cali nasciant e cresciant,
fraghint e colorint su logu, is froris
destinaus a una bellesa de cras.
Poita, est tempus custu.
S’airi imboddiccada de sa nebida
chi calat comenti unu crobettori
s’est bistida de cinixali
e a tesu s’appubant is umbras fuidoras
de un’axedda de birbantis,
is chi sezzint in is scannus prus artus
de is logus aundi si podit su chi si ‘olit,
poita innì dd’oi est sa forza de su dinai
circhendi cuadroxus, po si ponni’ foras
de sa castiada de sa giustizia
chi ddas inchisidi
po ddis domandai contus
de is peccaus in is calis
si funt ingrassadas e arricchidas.
Esti unu fui fui avolottau
de serbidoris chi si funti fattus meris,
de sei insoru, de is benis de sa comunidadi
chi hat tentu fidi in issus
chi no pariant sanguneras,
ladronis, acciupperis effingius,
ma chi hant scoviau sa naturalesa insoru
de margianis maladitus candu zerriaus
e arziaus a su poderi po guvernai
hanti cretiu de podi’ tundi e mulliri
chene torrai contus,
abarrendu affrancaus
de sa verifica e is castigus de sa lei.
Immoi cun arrexoni
ddus persighit sa giustizia
e a bregungia ‘nsoru su populu frastimada.
Ah ….su populu!
Su populu chi no si scit mirai de sei,
chi dormit e chi bisat
e chi a s’ora de votai, votada ancora
is margianis chi oi persighit sa giustizia.
Ma… Agittoriu!… Accurrei!
Currei fradis e fillus a sa prazza!
A sa prazza!
A sa prazza,
po discurriri de su beni e de su mali!
A sa prazza,
po discurriri de sa vida e de sa morti!
A sa prazza,
po allui fogus e po astrantaxai furcas!
Accurrei!…..
Non est prus tempus de muttettus de amori!
Non est prus tempus de brullas e de giogus!
Is margianis funt intraus a su medau,
sunti in corrazzu,
funti faendu stragu de su tallu!
Accurrei!
Benei armaus de brunzonis e fusilis!
Accurrei!
Arregollei cavunas, trabuzzus, schidonis,
leppas arregollei po stocchiggiai,
po bocciri, po scroxai is margianis
chi ‘olint sperdiri su tallu!
Accurrei! Accurrei! Zerriai!
Scidaindi is sonnigosus,
benei cun is femminas,
cun beccius a sa prazza benei.
A sa prazza!
Si ‘olint torrai a is tempus de Nuseu,
si ‘olint torrai a bivi’ scraus de meris
sene coru, ladronis e susuncus!
A sa prazza fradis mius, a sa prazza!
Atras bortas si ’ndi funti bius
margianis affliggius prenus de azza.
Currei fradis e fillus, a sa prazza!
No ddus lasseis passai, firmaiddus!
Currei, chi deu bia
de su cuccuru de is sessant’annus mius
chi seis ancora bius,
biazzus e capassus de binciri su mali
chi est in coru de is margianis di oi.