de Cristoforo Puddu.
In d’unu buscu ‘e ispantados mudimines
sa domo ‘e su poeta s’arrizzat attrivida
assolada e nuda che deghile fiore:
premediu sinnu ‘eranile annunziat.
Lisiu intunigu asulazzu totu l’inchinghet
e bestit che tuvuca abba ‘e mare
e mannaria ‘e chelu sempre limpidu.
S’aposentu mobiliadu cun pagos pinzos
– connoschet su misteriu lughidu ‘e s’anima –
cuvrenat che siddadu su dizionariu ‘e peraulas
ue s’isprigat lieru su mundu e s’omine.
Da – e sa ventana crarizat addae su pessu
in pasturas saliosas e campos arbatados
pro tuddidura e froeddas de vida a s’orizonte.
In su foghile ischentiddan litteras de fogu
e discansan calidos sonnios banduleris
in s’isettu ‘e carpire aidos e semidas
pro birare impidosos che undas de amore.
Sas nottes de luna impratean sa domo
e sa costera assimizante a faru in sos iscoglios
ghiat noos marineris a milli abbojos.
Aggiungi commento