Sa paghe de sos teulajos

Cun totu custos sardos paladinos,
sempr’impignados in verbosas giostras,
sighit a piumbare in palas nostras
su nerviu ‘e sos nostros aguzzinos.

Bisonzat bider su coraggiu ch’hana
contr’a sa feudale prepotenzia,
ma paret ch’hapan solu s’incumbenzia
de contare sos colpos chi nos dana.

Tant’est chi, cun filippicas iscrittas,
ovvero cun mirabile oratoria,
non potende ‘antare una vittoria,
dan solu contos de sas iscunfittas.

Su carru nostru, sas rodas imbèrghidas
hat sempre in d’unu perfidu pantanu,
pro ca tenen sas redinas in manu
avvocadeddos de causas pèrdidas.

Però, a los intender faeddende,
cun boghe arrajolida pro imbizzu,
duces cun manganello e ozu rizzu
paret sa provvidenzia imbiende.

Grascias a issos devet diventare,
sa Sardigna s’ottava meraviglia,
e faeddan in sardu pro puntiglia,
mancari chi no l’iscan faeddare.

Ma custos paladinos isolanos,
appena chi faeddan de ‘inari,
si nde ‘ogan sos ojos pari pari
ca totu be-i cheren ponner manos.

Un’usanzia como est diventada
su si legger sa vida in “limba” issoro,
ma forsi haian tentu prus decoro
s’haian giutu sa limba truncada.

Non creo, su sistema, chi lu giàmbene:
(cando l’han a giambare est troppu tardu)
como, chie si contat pius “Sardu”,
faghet finza s’analis de su sàmbene.

Si segnale ‘e vernaccia b’hat in mesu
tand’est de razza sarda verdadera,
ma si b’agatan traccias de barbera,
decretan “fora su piemontesu”.

Chie de veru sardu hat sa pretesa
pretendet puru s’autoridade,
e s’hat appena un’unza ‘e sardidade
si nd’attribuit nessi un’unza e mesa.

E faghet giuramentos e prommissas
de morrer pro su bene ‘e sa Sardigna,
però, subra cuss’anima benigna,
non giuat mai a fagher iscummissas.

Sun paladinos de natura rara
e pari pari s’istrazzan sas bestes;
sende masedos si finghen arestes
che ainos chi b’hat in s’Asinara.

Sas brigas sun sa neghe ‘e ogni male,
ma bae e nàralu a zente testarda;
pro ironia “S’Unione Sarda”
restat sol’unu titulu ‘e giornale.

Restat gai, che roda senza rajos,
unu populu dignu ‘e mezus gloria,
ch’in cant’a paghe passat a s’istoria
che-i “sa paghe de sos teulajos”.

S’istranzu sighit criticas a tèssere
contr’a sos sardos, continu in discordia,
ma si tra sardos bi fit sa cuncordia,
ite razza de “Sardos” dimis essere?!